المعلم شحاتة
المعلم شحاتة
يمين بالتلاتة
فتوة حارتنا من ربع قرن
مكتف ايدينا
وكاتم علينا
ومطلع في راسنا كم الف قرن
المعلم شحاتة
فظيع في الغتاتة
منفض جيوبنا قال ايه ضرايب
مروق قفانا
ومغيم سمانا
ومطلع عنينا ويقولي حبايب
المعلم شحاتة
عاملها شحاتة
بيطلب فلوس عمال م الامم
عيالي فقيرة
ديوني كتيرة
علينا بس يعمل الواد البرم
المعلم شحاتة
شديد في التباتة
ودمه بيلطش كتير م البشر
ما بيهمه ناس
ولا فيه حماس
يشيل من حارتنا كل الحفر
المعلم شحاتة
طلاق بالتلاتة
ماصص دم اهله ومنكد عليهم
وواخد فلوسهم
وحابس نفوسهم
ومدغدغ رؤوسهم وشالل ايديهم
المعلم شحاتة
واحد اتنين تلاتة
تاعب اهل حارته الفتوة الغلس
مضيع العمة
ولا عنده ذمة
واكل حق شعبه وفيه منغمس
المعلم شحاتة
بيحب الشماتة
وفاتح سجونه فنون م العذاب
يوضبنا فيها
ولو رحنا ليها
ندوق من عياله شوي الكباب
المعلم شحاتة
نايم وف سباته
ليل نهار يقول: انتــــوا ف نعيم
تاكلوا وتنسوا
بعدين بس تقسوا
وزي القطط كلام مش سليم
المعلم شحاته
بتاع شوكولاتة
ويفكرها منحة من اسرائيل
يبيعنا عشانها
ويشكل لجانها
ويبيع لعيونها كل شئ جميل
المعلم شحاته
ميت باستماتة
على الكرسي منه خايف يضيع
لازق فيه كمان
كأنه لبـــــــان
ولو راح يروح بعديه راح يصيع
المعلم شحاتة
خيال المأتة
بياكل في كرشة واحنا جوعانين
وامريكا خلفه
بتنفخ في خلفه
وتجهز لحكمه مئات السنين
المعلم شحاتوا
ما يهمه اللى فاتو
ولا اللى راح يشوفه وقت الحساب
مكبر دماغه
مورم صداغه
ومنيم ضميره في مقلب هباب
المعلم شحاتو
شربنا مغاتو
لما ولدت حرمه المصون الكريم
وهلت علينا
بشاير بطينة
لما شب ابنه الحرامي اللئيم
المعلم شحاتة
يمشي تاتا تاتا
وواخد حارتنا تجاه الخراب
ومعاه شلة فاسدة
لئيمة وحاسدة
وجايبة لحارتنا كثير اكتئاب
المعلم شحاتو
يقول بس هاتوا
ومايهمه ابدا ندعي عليه
ما يصيبه هم
ولا يجيله غم
لو كنا بندعي لله يبتليه
المعلم شحاتو
كبير وف مماتو
ما راح يلاقي دعاء ينفعه
هيجيله ملاك
ف وقت الهلاك
يقبض فيها روحه يشيله ويرقعه
ليست هناك تعليقات:
إرسال تعليق