المعلم في حفلة
في بلاد العم سام
مع ولاد اللئام
والمعلم مريح
و كل شئ تمام
قدموا له الشراب
مع شوية هباب
وكم مزة حلوة
وحلتين كبــاب
تقوم العمة واقعة
ويمــيل الدمــاغ
وتبقى يالهــوي وقعـــة
ويدولوا ع الصداغ
ويجيبوا له العقود
محطوطة فوق نهود
ويوقع المنيل
ويعطي لهم عهود
في مرة العقد غاز
وف مرة يكون كويز
ما عرفوا يعملوها
معانا الانجليز
يجيله يحط عليه
ببلوة وتبتليه
معلم بس خايب
وبيضحكوا عليه
شوية امريكان
ومعاهم اليهود
في الحفلة وهو هايم
يفتح كل الحدود
المعلم شحاتوا
معاه عيلته ومراتو
فاكرين حارتنا عزبة
سابهالهم اللى ماتوا
وورثوا المصريين
فوق الارض والطين
يبيعوا شوية فيهم
ويعذبوا الباقيين
وفي الحفلة المزاج
بيكون عالى وتمام
وبعيد الانزعاج
عن ضمير اللئام
يقعد يشرب فى نيلة
بيحسبها جميلة
وينسى انه حاكم
لحارتنا الأصيلة
يأنتكوا الفتــوة
ويجهزوا المخطط
ف الحفلة يعيش و يهيص
يمضى واحنا نطنطط
ياعم انت يافتوة
يابايعنا في يوم الحفلة
ياناهب حارتي بالقوة
وعامل فى الحارة قفلة
والواد ابنك يتمايل
حاشر بوزه في الليلة
على بوش عمال يتحايل
يهديله مصر قتيلة
واخوك احتل الشرم
وابنك كل الشركات
والست الحاجة مدامك
عملت ليها عصابات
عيب على شنبك يامعلم
حلقوه الامريكان
وعلينا احنا بتتكلم
على شعب اصيل غلبان
زعلانة البنت بهانة
من عمايلك يامعلم
وبتمضغ في اللبانة
عمالة عليك تتكلم
والناس كلها فى الحارة
عمالة تقول الحفلة
هاص فيها الفتوة
باعنا لولاد السافلة
ليست هناك تعليقات:
إرسال تعليق