سلام عليك

سلام عليك



بيمشي زى اللى مشيوا زمان
يقرر يهاجر يلاقي الامــان
بيشتاق يجاهد عشان امته
ويشتاق يروح وينسى اللى كان

نفس الطريق اللى كنت بشوف
ابطالك يا مصر مشيوا فيه كتير
عاشوا عشانك من غير أي خوف
عشانك يحاربوا بحب وضمير

ويقرر يهاجر، ويقرر يروح
وينسى اللى كان وينسى الجروح
ويمشى بعيد ويمشى ولكن
نفسه يضمد فينا الجروح

بيمشي بعيد وقلبه حزين
عيونه علينا على التعبانين
بيمشي ونسمع منه الانين
وتبكي عيونه على المحتاجين

مسيري تغيب وفي القلب باقي
رمز وشعار للمستضعفين
مسيري نحبك رغم الالام
ورغم الرحيل والقلب الحزين

ونرفع ايدينا نسلم عليك
نشاور ونهتف سلام للحبيب
وفي القب نبضك بيهفو اليك
وفي القلب حبك نلاقيه قريب

وترحل معاك كثير ذكريات
تشاور علينا الشعب الكسير
وتغسل عنينا دموع مبكيات
تلملم جراح البــلد الأسير

وتمشى الطريق ممنوش رجوع
وتمشي الطريق قدامك طويل
زى ما تمشي وسط الجموع
وتهتف لمصر تعيش! يا اصيل

وتنزل دموعى بكاءا عليك
على الامنيات اللى عشقتها
تمنيت وجودك وناديت عليك
تعالى نحقق ولو بعضها

لكنك بترحل تسيبنا وتمشى
تعبت ياغالي طويل الطريق
حاربت العدو وحاربت الحكومة
وفي الحرب ابدا ما يبقى صديق

عشان مصر كنت شجاع الميدان
حاولت ترجع لينا المكانة
وفي العلم انت حلاوة زمان
وشلت في ايدك كل الامانة

ودلوقتي انت فى طريقك لوحدك
واحنا ف طريقنا ماشيين مهزومين
ناقصنا فارسنا ومين بس قدك
يشيل عنا حمل في دنيا ودين

اليوم بس نزلت راية الفقير
هنتعب نلاقي فرسان الميدان
زماني تغير وفيه ناس كتير
وقل الرجال وقل الامان

كتير اللى خانوا
كتير اللى باسوا ايادى الصغار
وهنا وهانوا
وهانت عليهم كرامة الكبار
قليل اللى صانوا
كرامة بلادهم من الانهيار
وفي الحب كانوا
رجال في عزيمة وصبر وفخار

مسيري حبيبنا راح فين وسبنا
ما احنا تعبنا بعد الرحيل
شوقنا غلبنا وبعده اتغلبنا
واليأس جبنا وراح الدليل

وتنزل دموعنا وتنزل رايتنا
حاجات بس تنزل ما بتترفعش
ونستنى فارس يعرف غايتنا
يحققها لينا و ما بينحرفش

وبعدك نلاقى كم بس فارس
واقف ينادي شجاع كالهرم
هلموا تعالوا الله لينا حارس
تعالوا نكون فوق فى القمم

ونسكت نسيبهم بعدين نعيبهم
ولما يموتوا نقول محتاجين
ويتعب سكوتنا قلوب الحيارى
ونخذل بموتنا كثير تعبانين

مسيري ياراجل وكم الف راجل
ترجل وساب الميدان الكبير
ياعالم مناضل وفيه قلب فاضل
بيبني بعلمه وقلمه الكتير

هزمت بسيفك لوحدك عوالم
ميقدرش يحركها حتى القمم
كسرت بسيفك ولاد اسرائيل
رميت على الظالمين كتير م الحمم

مشيت بس حابب تفضل ما بينا
تحامي علينا ظلم الطغاة
لكن بس سايب شرارة في دينا
تحوش بس عنا بعض الغلاة

تعبت ياسيدنا منا علينا
تعبت وفينا الضعف الجميل
جميلك الينا راح جه علينا
رغم ما فينا شعب اصيل

سلام منا ليك، سلام عليك
وفي البعد نبكي شجاعة امم
بعد الرحيل فارقنا عنيك
وفي الموت بنفقد فيك القمم