ناس وناس
ناس في بلدي مبسوطين
وناس حزينة ومطحونين
عجبي على ناس قلبها
حجر على المظلومين
ورئيس حرامي موالي للأعداء
يدي خير بلادنا رخيصة للحلفاء
شكل عصابة بتحكم وياللعجب
يمصوا دمنا اكتر من الغرباء
وناس عايشة ف مارينا زى الفل
تمص ف دم و واكلة خير الكل
يمشي بسيارته والفقير اترمى
في الشارع قلبه عليه مايطل
وناس تبص من قصرها على ناس
فى حياتها ماشية قلبها منداس
لتحت الارض عينهم متكسرة
تعبهم الذل وكسرهم الافلاس
وناس فى حفلة شايلة قزازة خمر
بتمنها يغتني طول الفقير الدهر
يشربها ويدفع تمنها فى دقيقتين
والتاني ما يقدر يجمع تمنها فى عمر
وناس تطرب ودنها بملايين
ياخدوهم اهل الغنا التافهين
يتمنى الفقير بعضهم
ويديهم ودانه اتنين
وناس عايشة تدوق المر
عبد وبيقولولوا حر
عشان نفسه يبيع كلاوبه
ولعياله يعيش بيكر
وناس عايشة ولا الباشاوات
راكبين فى شعبنا الاغاوات
مسحوا الكرامة بالملاليم
وشوية دقيق وحاجات
ترابيزة عليها عيش والمش
وتانية اكلهاما بيتوصفش
ذنبه ايه الفقير يا غني
يجوع، يتهري البدن والكرش
وحياة من عذابها جنان
سجن، وفيه الانسان
وكل جريمته الفقر
جننه البيه السلطان
ياشعب مصر الدهب قول اه
بلادي ترابها دهب والله
اشوف شعبها واتقهر
قلبي من حسرته قال اه
قلبه كان كورة كفر
يحب الناس و البشر
ظلموه وف بلوته
كره البلاد واتقهر
جربت كاسين م العذاب و الهنا
لاتنين موجودين على ارضنا
فيه ناس وبيشربوا مبسوطين
وناس من عذابها متجننة
معلم نبوته خشب لكن حديد
سياستة تلاتين سنة مفيهاش جديد
ع الراس بيضرب وع الرجلين
ياتعيش كسيح واما ياتموت شهيد
وناس حواليه عايشة منتفعة بيه
فوق دماغنا راكبة وضاربين عليه
لو تعبت دماغنا ولابد يوم تسقط
راح يضربوا ويطبلوا على ايه
يا ابن الشهيد والدك مات مستجير
ايا مطحون مذلول تعبان فقير
يا تعيش مذلول حتى الممات
ياتموت فقير محتاج تايه حقير
فى الحياة لينا ماسابوش خيار
ولا غاز ولا شغل ولا الخيار
يانثور ويروح واحد من الاتنين
يانعيش بالكفن للاحتضار
ليست هناك تعليقات:
إرسال تعليق